එමෙරට අතිශය ජනාදරයට පාත්‍ර වූ ප්‍රවීණ රංගන ශිල්පියෙක් මෙන්ම ගුවන් විදුලි නිවේදකයෙකු ද වූ ඇල්ෆ්‍රඩ් පෙරේරා මහතා අභාවප්‍රාප්ත වී තිබේ.
ශ්‍රී ලංකා ගුවන් විදුලි සංස්ථාවේ ප්‍රවෘත්ති නිවේදකයෙකු වශයෙන් ඒ මහතා දීර්ඝ කාලයක් කටයුතු කළේය.
ගුවන් විදුලියේ ඉතා ජනප්‍රිය “විනෝද සමය” වැඩසටහනේ නිර්මාතෘවරයා මෙන්ම ආරම්භක නිවේදකයා වුයේ ද ඇල්ෆ්‍රඩ් පෙරේරා මහතාය.
එමෙන්ම ශ්‍රී ලංකා පාර්ලිමේන්තුවේ එසැන භාෂා පරිවර්තකයෙකු ලෙස ඔහු දීර්ඝ කාලයක් කටයුතු කළ අතර, පිලිපීනයේ මැනිලා නුවර වෙරිටාස් ගුවන් විදුලි සේවයේ සිංහල අංශය භාරව කටයුතු කර තිබේ.
චිත්‍රපට ගණනාවකට රංගනයෙන් දායකත්වය දැක්වු ඔහු ටෙලිනාට්‍ය කිහිපයක ද රඟපෑවේය.
ඒ මහතා මියයන විට 93 වන වියේ පසුවුණි.
දේහය මේ වනවිට මාකොළ පිහිටි supreme අවමංගල්‍යාගාරයේ තැන්පත් කර ඇති අතර, අවසන් කටයුතු එළැඹෙන අඟහරුවාදා දින සවස 3.30ට දළුගම දේවස්ථාන සුසාන භූමියේ දී සිදුකිරීමට නියමිතය.
