මාධ්‍යවේදීන්ට සහ මානව හිමිකම් ආරක්ෂා කිරීමට පෙනී සිටින්නන්ට විරෝධතා පිළිබඳව සොයා බැලීමට අයිතිය ඇති බවත් ඔවුන්ගේ ක්‍රියාකාරීත්වයට බාධා එල්ලනොකළ යුතු බවත් එක්සත් ජාතීන්ගේ සංවිධානය පවසයි.
අද අලුයම ගාලුමුවදොර ඇතිවූ සිද්ධිය සම්බන්ධයෙන් විශේෂ ට්විටර් පණිවුඩයක් නිකුත් කරමින් එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරක Hanaa Singer-Hamdy මහත්මිය මේ බව ප්‍රකාශ කර තිබේ.
එහිදී වැඩිදුරටත් අදහස් දක්වමින් Hanaa Singer-Hamdy මහත්මිය ප්‍රකාශ කර ඇත්තේ ගාලු මුවදොර විරෝධතාකරුවන් විසුරුවා හැරීමට බලය භාවිත කිරීම සම්බන්ධයෙන් එම සංවිධානය දැඩි අවධානයකින් පසුවන බවය.
එසේම සාමකාමී විරෝධතා පැවැත්වීමේ අයිතිය යටපත් කිරීමට උත්සාහ කිරීම තුළින් රට තුළ දේශපාලන සහ ආර්ථික අස්ථාවරත්වය තවදුරටත් අයහපත් අතට හැරිය හැකි බවද Hanaa Singer-Hamdy මහත්මිය එම පණිවුඩය මගින් වැඩිදුරටත් පෙන්වා දී තිබුණාය.
