ජනාධිපති අනුර කුමාර දිසානායක මහතා ජනපති කරවීමට තරම් සුදුසු අයකු නොවන ලෙසින් සමාජයේ මතයක් නිර්මාණය කිරීම සඳහා අසත්‍ය ලිපියක් සකස් කර එය සමාජ මාධ්‍යයට මුදාහැරියේ යැයි කියන සිද්ධියකට අදාළ සැකකරුවන් වහාම අත්අඩංගුවට ගන්නා ලෙස කොළඹ ප්‍රධාන මහේස්ත්‍රාත් තිළිණ ගමගේ මහතා අපරාධ පරීක්ෂණ දෙපාර්තමේන්තුවට (06) නියෝග කළේය.
මෙම සිද්ධියට අදාළව අපරාධ පරීක්ෂණ දෙපාර්තමේන්තුව අධිකරණයට ඉදිරිපත් කළ විමර්ශනයක කරුණු සලකා බැලූ මහේස්ත්‍රාත්වරයා මෙම නියෝග නිකුත් කළේය.
ජාතික ජන බලවේගය අපකීර්තියට පත් කිරීම මෙන්ම ජනපතිවරයා ඊට නුසුදුස්සකු බවට ජනතා මතකයක් බිහි කිරීමේ අරමුණින් අසත්‍ය සහ ද්වේෂසහගත ලිපියක් ජනාධිපතිවරණයට පෙර මුහුණුපොත ඔස්සේ පළ කර ඇතැයි සඳහන් කරමින් මෙම පැමිණිල්ල ජාතික ජන බලවේගයේ නීතිඥ සුනිල් වටගල මහතා විසින් ඉකුත් සැප්තැම්බර් මස 12 වැනිදා සිදු කරනු ලැබ තිබූ බව අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර තිබිණි.
අපරාධ පරීක්ෂණ දෙපාර්තමේන්තුවේ ඩිජිටල් වෝහාරික විද්‍යාගාර අංශය මඟින් මෙම සිද්ධිය සම්බන්ධයෙන් පරීක්ෂණ ආරම්භ කරනු ලැබූ බව ද එම දෙපාර්තමේන්තුව අධිකරණයට දැනුම් දුන්නේය.
ජනාධිපතිවරණයට පෙර මුහුණුපොත ඔස්සේ ප්‍ර‍චාරය කර තිබූ මෙම ද්වේෂසහගත අසත්‍ය ලිපිය ජාතික ජන බලවේගයේ ලිපි ශීර්ෂය සහිතව 2024 සැප්තැම්බර් මස 10 වැනිදා දාතමින් යුක්තව කොළඹ පෞද්ගලික රෝහලක් අමතා තමන් විසින් සකස් කළ පරිද්දෙන් නිර්මාණය කර පළ කර තිබූ බව පැමිණිල්ලේ සඳහන් කර ඇතැයි අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර ඇත.
මෙම ව්‍යාජ ලිපිය සමාජගත කිරීම තුළින් ජනපති අපේක්ෂකව සිටි අනුර කුමාර මහතා කොළඹ පෞද්ගලික රෝහලකින් ප්‍ර‍තිකාර ලබාගත් රෝගියකු බවට හැඟී යන පරිදි මහජනතාව තුළ යම් තහවුරුවක් කිරීමටත් එමඟින් ඔහු පිළිබඳ සමාජයේ අවිශ්වාසයක්, අප්‍ර‍සාදයක් ජනිත කිරීමට උත්සාහ දරා ඇති බවත් පැමිණිලිකාර නීතිඥ වටගල මහතා සිය පැමිණිල්ලෙන් දක්වා ඇතැයි ද අපරාධ පරීක්ෂණ දෙපාර්තමේන්තුව අධිකරණයට කරුණු සඳහන් කර තිබේ.
