කොස්ගොඩ මහ ඉඳුරුව ප්‍රදේශයේදී ඝාතනයකට සූදානම්ව සිටි සැකකරුවන් පිරිස සම්බන්ධයෙන් තවත් තොරතුරු රැසක් මේ වන විට අනාවරණය වී තිබේ.
ඊයේ (03) රාත්‍රියේදී පුද්ගලයින් සිව්දෙනෙකු ඝාතනය කිරීම සඳහා සූදානම් වෙමින් සිටි සැකකරුවන් පිරිසක් කොස්ගොඩ පොලිස් වසමේ අකාඩෙගොඩ ප්‍රදේශයේ නිවසක රැඳී සිටින බවට වලාන දූෂණ මර්දන ප්‍රහාරක ඒකකයේ නිලධාරීන්ට තොරතුරක් ලැබී ඇත.
එම තොරතර මත එම ඒකකයේ නිලධාරීන් කණ්ඩායමක් විසින් අදාළ නිවස වැටලීමට පියවර ගෙන තිබේ.
එම වැටලීම සිදුකරන අවස්ථාවේදී පොලිස් නිලධාරීන් දුටු එක් සැකකරුවෙකු පොලිසිය දෙසට වෙඩි තැබීමක් සිදුකර ඇත.
එහිදි පොලිසිය විසින් ප්‍රතිප්‍රහාරයක් එල්ල කර ඇති අතර එම වෙඩි ප්‍රහාරයෙන් එක් සැකකරුවෙකු තුවාල ලබා තිබේ.
එමෙන්ම එහි සිටි තවත් සැකකරුවෙකු අත්අඩංගුවට ගැනීමට මෙහිදී නිලධාරීන් පියවර ගෙන ඇති අතර තවත් සැකකරුවෙකු පලාගොස් ඇති බවද පොලිසිය පැවසීය.
එහිදි නිලධාරීන් විසින් අදාළ නිවස පරීක්ෂා කිරීමේදී නිවසේ තිබි ගිනි අවි සහ පතොරම් රැසක්ද පොලිස් භාරයට ගැනීමටද පියවර ගෙන ඇත.
ඒ අතර මිලිමීටර් 9 වර්ගයේ පිස්තෝල අවියක්, එම පතරොම් 8ක් සහිත මැගසිනයක්, රිවෝල්වර අවියක් හා එම පතරොම් 6ක්, මිලිමීටර් 9 වර්ගයේ මැගසිනයක් හා පතරොම් 6ක්, විදේශ රටක නිෂ්පාදිත අත්බෝම්බයක් අයත් බවද පොලිසිය පැවසීය.
එමෙන්ම අපරාධය සිදු කිරීම සඳහා යාමට සූදානම්ව තිබූ ව්‍යාජ අංක තහඩු සහිත යතුරුපැදියක් මෙන්ම ත්‍රිරෝද රථයක්ද මෙහිදී පොලිස් භාරයට ගෙන තිබේ.
පොලිසිය විසින් සිදුකළ ප්‍රතිප්‍රහාරයෙන් තුවාල ලැබූ සැකකරු බලපිටිය රෝහලට ඇතුළත් කිරීමට පියවර ගත් බව පොලිසිය සඳහන් කළේය.
පොලිසිය පැවසුවේ සිද්ධියෙන් අත්අඩංගුවට ගත් සැකකරුවන් අවුරුදු 32 හා 33 වයස්වල පසුවන මහඉඳුරුව ප්‍රදේශයේ පදිංචිකරුවන් බවය.
අත්අඩංගුවට ගත් සැකකරු හා දේපළ කොස්ගොඩ පොලිසියට ඉදිරිපත් කර ඇති අතර කොස්ගොඩ පොලිසිය හා වලාන දූෂණ මර්දන ප්‍රහාරක ඒකකය විසින් වැඩිදුර විමර්ශන සිදුකරන බවද පොලිසිය සඳහන් කළේය.
පොලිසිය සැක පළකරනුයේ ලොකු පැටී පාර්ශ්වයේ වෙඩික්කරුවන් පිරිසක් කරන්දෙණිය සුද්දා පර්ශ්වයේ පිරිසක් ඉලක්ක කර මෙම වෙඩි තැබීමට උත්සාහා දරා ඇති බවය.
මේ වන විට රක්ෂිත බන්ධනාගාරගත කර සිටින ලොකු පැටී නැමැති අපරාධකරුගේ සහෝදරයා වන පොඩි පැටී නැමැත්තා පසුගිය 01 වැනි දින අහුංගල්ල, වැලිකන්ද ප්‍රදේශයේ නිවසක සිටියදී ඝාතනයට ලක් විය.
ඝාතනයට පැමිණි වෙඩික්කරු පාගමනින් පැමිණ මෙම වෙඩි ප්‍රහාරය පොඩි පැටී නැමැත්තා ඉලක්ක කර නැවත පාගමනින්ම පලාගොස් තිබුණි.
ඒ අනුව මෙම ඝාතනයට පළි ගැනීමේ අරමුණින් ලොකු පැටී පාර්ශ්වය විසින් මෙම ඝාතන සිදු කිරීමට සැලසුම් කර ඇති බවට පොලිසිය සැක පළකර තිබේ.
