සෞදි අරාබියේදී විවිධ දුෂ්කරතාවලට මුහුණ දුන් ශ්‍රී ලාංකික ශ්‍රමිකයින් 40 දෙනෙකු වෙනුවෙන් රුපියල් ලක්ෂ 569කට ආසන්න මුදලක් පිරිනැමීම අද (13) ශ්‍රී ලංකා විදේශ සේවා නියුක්ති කාර්යාංශයේදී සිදු කෙරිණි.
කාර්යාංශයේ සාමාන්‍යාධිකාරී දේවප්‍රිය ගුණසිංහ මහතාගේ ප්‍රධානත්වයෙන් මෙම මුදල් පිරිනැමීම සිදු විය.
අදාළ ශ්‍රමිකයින්ට නියමිත කාලයට නොගෙවූ වැටුප් සහ දීමනා ලෙස සෞදි රියාල් 639,381ක මුදලක් (ශ්‍රී ලංකා රුපියල් ලක්ෂ 569ක් පමණ) අයකරගෙන ඔවුන් වෙත පිරිනැමීමට කටයුතු කර තිබේ.
මෙම වසරේ ජනවාරි මාසයේ සිට නොවැම්බර් 11 වැනිදා දක්වා කාලය තුළ සෞදි අරාබියේ ශ්‍රී ලංකා තානාපති කාර්යාලයේ රැකියා හා කම්කරු සුබසාධන අංශය විසින් සිදු කරන ලද නීත්‍යානුකූල මැදිහත්වීම්, මෙහෙයුම් සහ මුදාගැනීම් මගින් මෙම මුදල අයකරගෙන තිබේ.
එමෙන්ම, නීතිවිරෝධී ලෙස රඳවාගෙන සිටි ශ්‍රී ලාංකික ශ්‍රමිකයින් මුදාගෙන යළි ශ්‍රී ලංකාවට එවීමට ද එම අංශය කටයුතු කර ඇත.
එලෙස අයකරගත් ශ්‍රමිකයින්ට හිමි මුදල් ශ්‍රී ලංකා විදේශ සේවා නියුක්ති කාර්යාංශය වෙත එවා තිබූ අතර, ඒ අනුව රුපියල් ලක්ෂ 569ක් පමණ වූ එම හිමිකම් මුදල් අද දින අදාළ ශ්‍රමිකයින් වෙත පිරිනැමිණි.
