අමෙරිකාවේ සිට වැඩම කළ පූජ්ය පඤ්ඤාකර ස්වාමින් වහන්සේ ප්රමුඛ භික්ෂූන් වහන්සේගේ සහභාගිත්වයෙන් සිදුවන “ඒහි පස්සිකෝ” සාම පාද යාත්රාව මේ වන විට සිව්වන දිනය අද (25) පස්වරුවේ අවසන් විය.
ඒ, අද (25) පෙරවරුවේ මාවනැල්ල, බෙලිගම්මන විද්යාවර්ධන පිරිවෙන් පොත්ගුල් විහාරයෙන් ආරම්භ කළ සාම පාගමන තෝලංගමුව ජාතික පාසල වෙත වැඩම කිරීමත් සමඟය.
තෝලංගමුවේ සිට හෙට (26) පස්වන දිනට ගමන් ආරම්භ කරන සාම පාද යාත්රාව කජුගම, යක්කල, මහර, කැලණිය හරහා ලබන 28 වැනිදා කොළඹ නිදහස් චතුරස්රය වෙත ළඟා වීමට නියමිතව තිබේ.
මේ අතර ලෝක සාමය පතා සිදුකරන, ජාත්යන්තර අවධානය දිනාගත් සාම පාගමන සාර්ථක කරගැනීම සඳහා අවශ්ය සහයෝගය ලබාදෙන ලෙස පොලිසිය ජනතාවගෙන් ඉල්ලීමක් සිදු කරයි.
මෙම සාම පාගමන පිළිගැනීම සහ එයට ගෞරව වන්දනාමාන කිරීම සඳහා පාගමන ගමන් කරන මාර්ගය දෙපස විශාල වශයෙන් ජනතාව එක්රැස්වීම් නිරීක්ෂණය වන බවයි පොලිස් මූලස්ථානය පෙන්වා දෙයි.
සැදැහැවතුන් තුළ පවතින ගෞරවය සහ උනන්දුව අගය කොට සලකන නමුත් ඇතැම් ප්රදේශවල ජනතාව එක්රැස් වන අවස්ථාවලදී එකිනෙකා තල්ලු කරගැනීම්, තෙරපීම් හා වීඩියෝගත කිරීම් මෙන්ම පාගමනට එක්ව සිටින ආලෝකා සුනඛයා ස්පර්ශ කිරීම හා සෙල්ෆි ඡායාරූප ගැනීමට උත්සාහ කිරීම සාම පාගමනට බාධාකාරී තත්ත්වයක් බව පොලිසිය පැවසීය.
පාගමනට එක්ව සිටින භික්ෂූන් වහන්සේ ශ්රී ලාංකික ජනතාවගෙන් බලාපොරොත්තු වන්නේ විනයගරුක හැසිරීමක් වන බැවින් මාර්ගය දෙපස එක්රැස්ව සාම පාගමනට ගෞරව දැක්වීම විනයානුකූලව සහ මනා සංයමයකින් යුතුව සිදුකරන ලෙස පොලීසිය ජනතාවගෙන් ඉල්ලීමක් සිදු කරයි.
විශේෂයෙන් එම භික්ෂුන් වහන්සේ හා දූත පිරිසට බාධා හෝ හිංසාකාරීවන ක්රියාවන් සිදුනොකරන ලෙසත් ඔවුන්ගේ ආරක්ෂාව සැලසීම සදහා සහයෝගය ලබාදෙන ලෙසත් පොලිසිය වැඩිදුරටත් දැනුම්දෙයි.
