අනාරක්ෂිත ලෙස ඉන්ධන ගබඩා කරගෙන සිටි පුද්ගලයින් දෙදෙනෙකු බෝගහකුඹුර සහ මිරිස්ස යන ප්රදේශවලදී අත්අඩංගුවට ගෙන තිබේ.
පොලිස් මුලස්ථානය සදහන් කළේ බෝගහකුඹුර බොරලන්ද ප්රදේශයේ වෙළදසැලක අනාරක්ෂිත ලෙස ඉන්ධන ගබඩා කර ඇති බවට ලද තොරතුරක් මත සිදුකළ වැටලීමකදී පෙට්රල් ලීටර් 91ක් සමඟ සැකකරු අත්අඩංගුවට ගත් බවය.
අත්අඩංගුවට ගත් 42 හැවිරිදි සැකකරු වැලිමඩ මහේස්ත්රාත් අධිකරණයට ඉදිරිපත් කිරීමට නියමිතය.
එමෙන්ම මිරිස්ස ධීවර වරායේ අනාරක්ෂිත ලෙස ඩීසල් ලීටර් 4070ක් ගබඩා කරගෙන සිටි පුද්ගලයෙකු ද අත්අඩංගුවට ගෙන තිබේ.
පොලිස් මූලස්ථානය සදහන් කළේ අත්අඩංගුවට ගත් 33 හැවිරිදි මිරිස්ස ප්රදේශයේ පදිංචි සැකකරු අද මාතර මහේස්ත්රාත් අධිකරණයට ඉදිරිපත් කිරිමට නියමිත බවය.
