කිසිදු ලෙසකින්වත් ලේක්හවුස් ආයතනය විකුණා නොදමන බව විෂය භාර ඇමැතිවරයා ලෙස තමන් සහතික වන බව කැබිනට් ප්‍රකාශක, ජනමාධ්‍ය, ප්‍රවාහන හා මහාමාර්ග ඇමැති, ආචාර්ය බන්දුල ගුණවර්ධන මහතා පැවසීය.
එවැනි කැබිනට් පත්‍රිකාවක් ඇමැති මණ්ඩලය වෙත ඉදිරිපත් කිරීමට තමන් සිහිනෙන් හෝ සිතා නැති බව ද ඇමැතිවරයා කීවේය.
ලේක්හවුස් ආයතනය විකුණා දැමීමේ සූදානමක් ඇති බවට පසුගිය ඉරිදා ‘සති අග අරුණ’ පුවත්පතේ පළ වූ වාර්තාවක් සම්බන්ධයෙන් රජයේ ප්‍රවෘත්ති දෙපාර්තමේන්තුවේ ඊයේ (02) පැවති කැබිනට් තීරණ දැනුම් දීමේ මාධ්‍ය හමුවේදී මාධ්‍යවේදියකු ඇසූ ප්‍රශ්නයකට පිළිතුරු දෙමින් ඇමැතිවරයා මේ බව සඳහන් කළේය
ලේක්හවුස් ආයතනය සංචාරක හෝටලයක් කළා නම්, මුද්‍රණ කටයුතු වෙනත් තැනකට ගෙන ගියා නම් වැනි යෝජනාවන් මාධ්‍ය හිතවතුන් එක් වූ විට ඉදිරිපත් වන බවත් එහෙත් රජය හෝ විෂය භාර ඇමැතිවරයා ලෙස තමන්වත් එවැනි යෝජනාවන් කර නැති බවත් ඒ මහතා කීවේය.
මීට ජනාධිපතිවරයාගේ නම ඈඳලා තිබුණා. සම්පූර්ණයෙන්ම කිසිම දිනක එතුමා එහෙම තමන්ගේ පෞද්ගලික දේපොළ හෝ ඥාති හිතවතුන්ගේ දේපොළ පිළිබඳ කටයුතු කර නැතැයි බන්දුල ගුණවර්ධන මහතා කීවේය.
තමන්ගේ දේපොළ ගැන තවත් හිතන්නේ නැතුව මේ දේපොළ පිළිබඳ මෙතෙන්දි තීරණ ගනීවි කියලා හිතන්න බැහැ යැයිද කම්කරු හා විදේශ රැකියා ඇමැති මනූෂ නානායක්කාර මහතා පැවසීය.
එහෙත් රාජ්‍ය මාධ්‍ය ආයතන සියල්ල මේ වන විට විශාල අලාභ මට්ටමක පවතින් බව පැවසූ ඇමැතිවරයා එම තත්ත්වය කළමනාකරණය කරගෙන ඉදිරියට ගෙන යෑමට සියලු සේවකයන් සහ වෘත්තීය සමිති සමඟ සාකච්ඡා කර අලුත් ක්‍රමවේදයක් සකස් කරන බව ද පැවසීය.
ඇමැතිවරයා වැඩිදුරටත් මෙසේද කියා සිටියේය.
“මාධ්‍යවේදී හිතවතුන් එකතු වුණාම විවිධ යෝජනා ගේනවා. මීට වඩා හොඳයි සංචාරක හෝටලයක් කරා නම්, හොඳයි මුද්‍රණ කටයුතු වෙන තැනකට ගෙන ගියා නම් වැනි යෝජනා ඉදිරිපත් වෙනවා. රාජ්‍ය මාධ්‍ය ආයතන සියල්ල විශාල අලාභ මට්ටමක් යටතේ තමයි පවත්වාගෙන යන්නේ. අලාභය නෙවෙයි ප්‍රශ්නය. ඊළඟ මාසයේ වැටුප් ගෙවීම් පිළිබඳයි ප්‍රශ්නය. ඉතා විශාල සේවක අතිරික්තයකට වැටුප් ගෙවා ගන්න බැරි ගැටලුවකට මම මුහුණ දෙනවා. මම විෂය භාර ඇමැතිවරයා ලෙස මීට පෙර භාණ්ඩාගාරයෙන් මුදල් ඉල්ලලා ගෙවලා තිබෙනවා. මේ මොහොතේ භාණ්ඩාගාරයට එම මුදල් සැපයීමේ කිසිදු හැකියාවක් නැහැ. රට දැවැන්තම ආර්ථික අර්බුදයකට මුහුණදීලා තිබෙන්නේ. කැබිනට් පත්‍රිකා දුන්නට වැටුප් ගෙවීම සඳහා මුදල් දෙන්න නොහැකියාව දැනුම් දීලා තිබෙනවා. සියලු සේවකයන්, වෘත්තිය සමිති සමඟ සාකච්ඡා කරලා අලුත් ක්‍රමවේදයක් හදා ගන්න ඕන, කොහොමද අපි මේ ආයතන බේර ගන්නේ කියලා. එහෙම නැතුව වැටුප් ගෙවන්න බැරුව සම්පූර්ණයෙන් වසා දැමීමේ තත්ත්වය නතර කරලා අපි කොයි ක්‍රමයට ද වියදම් කළමනාකරණය කරලා කොහොම හරි හුස්ම ගන්න තත්ත්වය හදා ගන්නේ කියන තත්ත්වය හදනවා. විකුණන්න හෝ වසා දමන්න කටයුතු කරන්නේ නැහැ.”
