කැලණිය විශ්වවිද්‍යාලයේ සිසුන් දෙපිරිසක් අතර පසුගියදා ඇතිවූ ගැටුම පිටුපස දේශපාලන කණ්ඩායම් සිටින බවට කැලණිය විශ්වවිද්‍යාලයේ මහා ශිෂ්‍ය සංගමය චෝදනා කරයි.
කෙසේ වෙතත් අදාළ පහරදීමට කැලණිය විශ්වවිද්‍යාලයේ මහා ශිෂ්‍ය සංගමය වගකිවයුතු බව පහරකෑමට ලක්වූ සිසුන් වෙනුවෙන් පෙනී සිටි විශ්වවිද්‍යාල ආදි විද්‍යාර්ථි ක්‍රියාකාරී මධ්‍යස්ථානය අද (05) පැවති මාධ්‍ය හමුවකදී චෝදනා කළේය.
පසුගිය ඔක්තෝබර් 31 වනදා කැලණිය විශ්වවිද්‍යාලයේ ආපනශාලාවේ දී නවක වධ සිද්ධියක් සම්බන්ධයෙන් ඇතිවූ මත ගැටුමක් හේතුවෙන් සිසුන් දෙපිරිසක් අතර ගැටුමක් සිදුවී තිබේ.
කළමනාකරණ පීඨයේ ගණකාධිකරණ අධ්‍යනාංශයේ දෙවන වසර ඉගෙනුම ලබන ශිෂ්‍යයෙකුට සහ ඔහු සමග සබඳතා පැවැත්වූ තෙවැනි වසර සිසුන් කිහිපදෙනෙකුට මෙලෙස පහරදී ඇති බව වාර්තා විය.
පසුව අදාළ ශිෂ්‍යයා එදින පස්වරු 8.30ට පමණ කිරිබත්ගොඩ පොලීසියට ගොස් තමන්ට පහරදීමක් සිදුවූ බව පවසා පැමිණිල්ලක් සිදුකර තිබේ.
